外交部對溫家寶遭擲鞋表強烈不滿 認為行徑卑劣
2009-02-03 HKT 16:16
外交部發言人姜瑜表示，對於國務院總理溫家寶在英國劍橋大學演講時被掟鞋，中方表達強烈不滿，認為是卑劣的行徑，而英方已表明會依法處理擲鞋的人。
總理溫家寶在英國劍橋大學演講時被掟鞋，外交部發言人姜瑜表示，中方對事件表示強烈不滿，英方已向中方深表歉意，並表示將對掟鞋的人依法處理。
姜瑜表示，溫家寶在演講過程中，有人極力干擾現場，破壞演講，遭現場師生強烈反對，該批滋事份子在一片斥責聲中被帶離現場，而這種卑劣行徑是不得人心，也阻擋不了中英兩國友好合作關係發展的勢頭。
經歷過上任美國總統小布殊比人掟鞋之後，中華人民共和國o既總理溫家寶都比人掟鞋，其實沒有咩大不了。
仲記得布殊比人連掟兩次鞋，果次鞋真係飛在布殊o既面前，他幾廿歲人但係就一一避開，避完仲笑笑口，仲識得拎起人地隻鞋話係 Nike o既 10 號鞋。
溫總呀溫總，你睇下人地做得民主o既美國總統，就係同你 d 獨裁政府唔同－－即使被喻為係五十年來最差o既美國總統，即使係幾咁乞人憎o既性格，佢o既即時反應，係識得化大事為小事，化劍拔弩張為一個笑話。
呢 d 水平（風度）真係領先中國幾百年。
各位中國膠門睇開 d ，中華人民共和國總理終於同美國總統睇齊，成為全球掟鞋人士o既對象，唔係證明左土共【大腳崛起】嗎？掟鞋又唔係掟炸彈，仲要掟得咁唔準，交比英國方面處理未得囉，洗唔洗發表咩【強烈不滿】，又話人地【行徑卑劣】之類呀？
早排有人掟布殊，唔係成班中國膠都拍哂手好開心，大讚掟得好咩？
唔少土共支持者仲將掟鞋改圖貼在各大討論區，好開心o架喎～
今次掟o既唔係布殊而係自己o既國家總理，唔知佢地係唔係立即一百八十度掉轉槍頭，學外交部話人地【行徑卑劣】呢？講黎講去，唔通掟美國總統係替天行道，掟中共總理就係行徑卑劣？恐怖份子炸美國，炸以色列，從來聽唔到有人鬧【行徑卑劣】，仲話人地入侵加沙唔岩，今次畀人掟隻鞋，洗唔洗咁大反應呀？唔通要大叫【抵制英貨】呀？
係囉～之前成班友改遊戲掟布殊，又冇人講話係要針對美國人；美國人民選o既總統比人掟，但係就唔係針對美國人民；反過黎唔知點解，一個獨裁冇選舉o既總理被掟，有人就自稱代表中國人民，就話係中國人民受辱！真係諗極都唔明…
一時又話溫總係好人唔應該比人掟，一時又話溫總係代表中國人比人掟，咁點解掟佢o既唔可以代表佢掟共產黨呢？話時話，除非支持台獨，否則台灣人民點樣承認溫家寶係【中國總理】呀？如果只係【中華人民共和國總理】，而唔係【中國總理】，又點樣代表海內外o既所謂【中國人民】呢？
溫嘉寶被掟鞋：
http://hk.youtube.com/watch?v=IQ_50VrLUBo&eurl=http://plastichk.blogspot.com/2009/02/blog-post_03.html
小布殊被掟鞋：
http://hk.youtube.com/watch?v=VFX-dKpcDz8&eurl=http://plastichk.blogspot.com/2009/02/blog-post_03.html
沒有留言:
發佈留言