增強自信

自信，就係決定一個人成功與否o既最大關鍵（排第2，係樣貌後面，不過睇個人而定）。

學業，事業，生活，愛情，什至成個人生，你有自信，先可以做得更多，做得更好。

有自信o既人，就做乜都可以吸引到人，做乜野都好睇。就算你某日出門口時失足跌倒，襯錯衫，配錯鞋，整亂左個髮型，只要你行路果時繼續滿懷信心，至少都仲可以比某 d 人覺得－－唔通佢係故意著成咁樣？佢係到吸引人嗎？

人地當你奇奇怪怪，頂多都係「道不同不相為謀」，佢並冇睇死你bo～
「標奇立異」（無用錯成語吧？）同與「醜」之間，相差o既，就係一份自信。

咁樣，點先可以建立自信呢？（自點黎喇）
近幾年有唔少「啟發潛能」課程出現，有參加過o既人講過，為左激發自信，導師會叫大家每朝早起身時，就對著鏡入面o既自己，大聲狂叫：「我係得o既！」「我係得o既！」「我係得o既！」

呢個方法唔係唔好，但我認為咁樣做，其實係一種催眠－－正如你會唔會對著鏡入面o既自己講「我係全世界最靚仔o既男人！」一樣…

真正o既改變，應該係由想法入手。宅男們請你地先諗一諗－－點解你地會咁冇自信？冇自信，就因為你地習慣左比較！而且最鐘意拎人地o既強項，去同自己o既缺點比較！

同李嘉誠比，同香港先生比，同曾蔭權比，你點可能唔會輸？比著我，都會輸喇！
教你一個方法：拎一張紙出黎，寫低自己o既所有長處－－對電腦有興趣，打機勁，對動漫有深入o既了解，又或者行業/學科上o既專長，又或者身高，誠懇等，都可以寫低。

然後將紙摺埋，收起枕頭低（其實邊到都得）。第2日起身時，就拎將紙出黎，當乜都唔知咁，深入咁睇一次。你就會發現－－原來你都唔係咁差姐～

紙上面寫o既長處，雖然肯定一山還有一山高，但世界上能夠擁有呢種長處組合o既人，就只有你一個。與其將時間攞去為自己o既缺點而自卑，倒不如用黎為自己o既長處而驕傲喇！

地球上每一個人，都應該有資格係街上抬卷頭行路，因為所有人都係獨一無二。
當中，緊係包括你同我喇！