偽中產之都

香港除了是乜野動感之都，亞洲國際之都之外，仲有一樣野值得推廣，就係偽中產之都。

當世界各國o既中產追求品味之餘，最有趣o既係膠港o既偽中產，用膠國的【選擇性看到】o既邏輯，去選擇性【品味】。

舉例說，當年日本明治維新，搞全盤西化就係全盤西化，把人地o既產品同品味細心研究，由於制度興文化拒絕完全西化，所以未竟全功，搞出軍國主義以及變相繼承左門閥世家o既財閥，卻最起碼把人地o既技術同埋品味學得活靈活現，甚至青出於藍。

係呀，我地o既偽中產價值，也把人地o既噱頭學得活靈活現，巴黎有凱旋門，香港都有；紐約有時代廣場與世貿中心（雖然炸左），香港都有；最得意就係，明明係縮水樓，改個【豪名】包裝一下就變成左【豪宅】－－膠港真係包羅萬有。

看看近年的【豪宅熱】，之前幾年興豪乜豪物，近來就 La 乜 Le 物，天花龍鳳搞呢搞路，最終咪又係羊毛出在羊身上，仲未計屈硬你十倍ｏ既所謂管理維修保養費，愈多所謂【設施】，日後就愈多煩惱，呢 d 都已經唔計，最過癮係，連保安都要搞大龍鳳。

朋友講起去港島東某【豪宅】，笑言係去【探監】－－唔單止出入要有保安卡，連坐電梯去邊層，都要由管理員控制！嘩，好大陣仗呀？點解唔見 d 真正豪宅好似陽明山莊果類會搞呢套？乜原來要人按 lift 好過癮？ 不如搵 d 美少女廿四小時做電梯女郎呀笨？舉個例如果有咩事頭暈身臖，好似明愛醫院果單咁在門口暈左，管理員大佬應該救你先，定係按 lift 先呢？就正如有某 d 大型屋苑的【低智能電梯系統】，搞到繁忙時間坐電梯仲難過跑落街，High Tech 低能o既樂趣，認真寧舍不同。

呢種偽中產價值，在呢 d 新興樓盤中活靈活現，帶來諸多規舉，朋友探訪要登記乜登記物查家宅，菲傭單獨時只准坐客 lift，呢一切一切，最終就報在小朋友身上囉－－在家請一個外人一同居住已經奇怪，平日呼呼喝喝工人，小朋友看在眼內就恂有樣學樣，第一樣就學識欺壓他人；教育變成左縱慾，乜野都學卻冇樣用心，就同家長自己只識搵錢一樣膚淺；想子女做音樂神童，你自己聽乜？想子女跳好芭蕾舞？平日你又欣賞 d 乜？當自己只係識跟風去買乜野【十大好書】，Best Sellers 果 d 混吉書時，你又期望仔女學識乜野？係囉，學搵錢囉至多。

古人說「發財立品」－－今人說「發財混吉」，胡混日子得個吉，洗得錢再多，根本同燒香冇分別，就係買自己的良心過得去，可以自欺欺人話已經好盡力，其實只係掟左好多錢落咸水海；要教仔女尊重人，自己有冇尊重過工人？要教仔女藝術，自己係唔係只識沉迷 TVB？

La Mer，掉錢落海，La Mer，住豪名車，胡亂咁車€ La Mer~ La Mer 咩多幾野～扮哂奢～