2009年1月31日星期六

徹底失敗了…

唉…以為萬事俱備,只欠東風
原來不但東風,連【水軍】都冇

今朝8點打後去左鐨石山,諗著早 d 到可以早 d 搵到珊…

之後狂打比淆…
等到11點30分我就開始去地鐵站等珊…

到左12點左右,我見到珊同淆出現喇…
珊照舊喇…馬尾加上左陰…

第一眼我見到淆就同佢打眼色…
之後我諗著同珊開始道歉,點知我睇見珊聽緊電話…
於是就唔上去打擾著…

之後我同淆跟著係珊後面…

淆同我講珊係扮緊聽電話…
我都唔確定…

之後行行下唔見左珊,我同淆就分散去搵…

過左冇幾耐就見到珊係2樓,我同淆就一齊去搵佢

見到珊都仲係係到傾電話…

之後我地等到珊傾完電話後,珊連望都唔望我一眼就同淆講我地走吧

之後我就上前,講:珊,對唔住
珊回答:你收皮喇~

…
即場呆左幾秒…

收…皮?姐係我無希望…?

果陣時我已經打定輸數
如果珊係假嬲o既話…就唔會用粗口回敬我

之後珊就走左去唔知邊到…淆叫我追,但係追左一陣之後就唔見左珊…

此時JohnLo(下稱徒弟)打電話比我同佢見面〔徒弟你好高呀.....〕

之後我同徒弟一齊係皇者到睇比賽,無咩搵到珊…

期間我一直有打電話比淆確認佢地位置…

睇完比賽之後我就再搵珊…
可惜都係搵唔到,終是我同徒弟仲有岩岩黎o既抽水分頭搵…

無意中我撞見珊,應該要人生中最後一次吧…?

我無再同珊講野,因為…我再講乜野都已經冇用…

佢可以咁認真咁叫我收皮…就表示珊永遠都唔會原諒我…

我只係拍左淆一下以示我岩岩經過…

之後我同徒弟同抽水去左m記食野…

食完野之後掛著睇比賽…唔經唔覺就完左場…

之後我再打比淆…發現珊話要避我而走左…
珊仲叫我以後唔好再搵佢--絕交吧小任!

唉…我精神真係就快崩潰…

估唔到我摺o既星星,2點幾起身寫o既心意卡,都用唔著不得止
仲令到珊更加憎我…

唉…小任你真係個失敗者
道個歉都可以搞成咁
小任你去死吧

其實…我都有諗過介下手咁…可惜最後我淆痛
我最估唔到係珊係未下火,反而日子過得壞耐就越升得快

一句話可以搞到我諗到去自殺o既地步…
唉…或者我同珊真係有緣無份吧…?

始終我覺得我比唔到幸福珊,我唔係佢夢寐以求o既青鳥…

雖然珊今次好狠地拒絕左我,但人還在心不死
或者比珊冷靜2個月吧…兩個月唔接觸珊的確對我黎講好痛苦…
但係為左未來,一定要做

唉…精神已陷入崩潰中…

係呢到好多謝淆一直做我同珊o既磨心…
淆…辛苦你了…

2009年1月28日星期三

星星都好似唔夠誠意…

總合呢兩日o既日記…

初二又係去呀爺都拜年,不過今次就多左好多表弟表妹黎~_~

今次真係有救喇
我講o既係我 d 星星…

食完團年飯之後班表就過到我屋企,一齊係到摺星星-,-

呵呵,摺左成3個鐘…班表仲教埋我點樣摺星星…
經過佢地有同對牛彈琴o既教學,我終於都學識喇…

我地摺左1樽有多,
之後佢地走左,我繼續係到暨,但係始終冇班表摺得咁好…

睇我要買多個大樽先得喇…



因為初三赤口易嘈交,所以今日就冇出去拜年

朝早起身我幹掉左功課中山入面其中一樣…
唔經唔覺已經得返2樣功課…假期仲有一個星期,要快 d 做哂佢喇…

今朝早PC打過黎問我點樣比返 d 星星我,同埋提我買個大 d o既樽

好多謝PC幫我摺左咁多粒星~_~

今日都真係幾無聊下,由朝到晚狂打機…
得閒摺幾粒星星…

唉…

聽日又冇年拜(老豆話取消唔去大伯果到)

聽日係作文o既好時機,繼續幹掉果埋功課小山吧…

2009年1月27日星期二

究竟係我好太真好傻,定係珊花心?

珊佢鐘意新鮮感--呢個結論我早就知道

就係因為珊呢樣野,我先唔敢向佢表白…
咁早開始o既話,咪只會更早散…

有人話我好傻,明知珊呢 d 玩玩下o既人,我同珊好大可能無結果,問我點解仲要行埋去
我真係唔知點答…

也許係我天真傻吧?

但係--【情人眼裏出西斯】,即使知道珊o既缺點,我認為…都應該包容佢 d 缺點
一對夫婦,要互相包容,先可以一生一世嗎…(好似太長遠了)

總之,珊有咩缺點,我都會照包容…
希望珊會接受我吧…

2009年1月26日星期一

點解?(1月24日)

夜晚10點幾,我終於踏入左一個令我悲喜交加o既地方--新都會廣場

之前我都諗過應唔應該黎好,但係我最後都係黎左…

雖然我知道黎左都冇可能會搵到珊,但係我始終都係黎左,因為……我始終放唔低珊

我用著好似MK仔o既look去著搵珊,但係因為睇唔到野,最後都換返個樣

今次第一時間去o既地方唔係果個願望樹,而係去公園搵珊
見到公園封左,於是就去左廣場中心o既願望樹…

到左果個代表著【友情人終成眷屬】o既樹了…望一望周遺,睇下見唔見到珊先…
一次一次o既希望只會換黎一次又一次o既失望…結果係搵唔到o既…

到左10點半,我真係搵到好失望,於是就企左係我同珊最後一次見面o既果個地方(廣場對上)到休息

望返廣場中o既人--個個都有伴侶,細路就有家人陪著,一齊渡過除夕

睇到呢個情景,都不禁引起我o既傷感…
所謂【人有悲歡離合,月有陰情完缺】,我終於明白到蘇軾想表達乜野情感了…

當你諗起你好想見果個人,但係又唔可以見,就會怨天尤人…呢種感覺我明白

點解總要係我失去珊o既時候先見到呢個情景?

我好嬲,即刻將成個新都會廣場搵一次,結果都係冇珊o既一少少行蹤

又返到去果個地方…

但係再想返蘇軾,佢不但只冇怨天尤人,反而更自我開解:
【但願人長久,千里共嬋娟】--雖然我同弟弟子由相距千里,但係我都想弟弟以及我一家人平平安安,可以一齊睇呢個圓滿o既月亮…

俗話都有講:【退一步海闊天空】--如果我成日都去新都會搵珊,珊當然會日日避我喇,自然就會減少黎新都會廣場…

我唔應該成日都去煩著佢,或者比個機會大家冷靜一下,諗清楚再表態都未遲吧?

但願珊可以永遠平安,可以同佢o既青鳥(未必係我,都未必係佢現時男友)永久一齊,共渡所有時光吧…

諗到呢到,我成個人心情鬆左好多,但同時都問自己:我o既青鳥究竟係邊到?

答案當然係未知知數喇…

不過我會努力!

之後我再係新都會行多轉,都係搵唔到…

也許我應該退一步吧…?但不能完全後退~

之後我決定返屋企(當時11點),但係我先去左願望樹下

我低頭許願:珊,祝你前途一片燦爛,感情事業一片光明…

之後我就返屋企了…


至於朝早o既事留待有機會再講吧…

2009年1月25日星期日

唉…

今日朝早起1諗著做功課,點知眼訓到頂唔順,11點半起身都仲係眼訓…

果堆功課小山呀…真係冇咩心情幹掉佢

之後一路狂打機,打到5點後 d 就出街去提前彌撒…

一時去到先諗起要摺星星…

唉…點解個個都識摺,得我唔識摺架…唉…小任呀…

彌撒完左之後我地就各有各事做,睇黎呢個年假…都冇咩機會出黎玩…

之後去左呀爺果到食團年飯

之後就返左黎又繼續打機…

聽日年30大家都有野做…我係呀婆到食完團年飯,好大機會會去新都會到撞下珊…

呀…要買心意卡…寫多封人手寫o既道歉信…不過我寫得好樣衰架bo…
算喇…心意才是首要…總之,小任加油吧…

2009年1月24日星期六

終於放年假喇(1月23日)

我地間學校真係冇人情味架,年28都唔肯放人,真係搞錯…

等左咁耐終於都得放學果一刻喇…

但可惜…老師比左好多【新年禮物】我地…

果堆作業小山真係冇乜心情清左佢…

算喇…

之後放左學返屋企換件衫就趕著去沙田

等左15分鐘,PC終於都到喇…

之後我跟佢地(幾個主日學小導師)去左圖書館附近唔知做乜-,-

之後等到龜黎左,佢地就走左去買野食留我一個係到-,-

都估到會咁架喇,好彩我帶左部nds黎玩姐-,-

玩左30分鐘之後,佢地終於返黎喇…可惜買唔到啤酒-,-

佢地見到我著校服,話我著校服個樣好乖-,-

即場o左-,-

之後5點30分就散水…

等左咁耐年假終於放得喇…

係到祝大家新年快樂

2009年1月23日星期五

真係衰開有條路

今日最令我唔開心就係派v.a

真係搞錯…卷18/25,晝就拉到低哂,結果變左做24/50

唉…真係衰開有條路…我v.a.由中一開始係未試過合格…今次已經算做好高分,但係始終都係唔合格…

唉…

總之呢…以後要加把勁了…呢家就要加把勁去摺星星

加油吧…